తెలుగ దేలయన్న దేశంబు తెలుగేను తెలుగు వల్లభుండ తెలుగొకండ ఎల్లవారు వినగ ఎరుగవే బాసాడి దేశ భాషలందు తెలుగు లెస్స

Tuesday, June 29, 2010

మనిషి ఎదుర్కోలేని కష్టాలను భగవంతుడు ఇవ్వడు.అలాంటప్పుడు ఆత్మహత్యలు చేసుకోవడం అవసరమా?

మొన్న మౌనిక అనే నర్సింగ్ చదివే అమ్మాయి ఆత్మహత్య చేసుకొంది. ఇంత చిన్న వయసులో పిల్లలు అలా ఆత్మహత్యలు చేసుకోవడం చూసి ఎందరు బాధపడరు? కొందరు పరీక్షలలో తప్పామనో, మరి కొందరు ప్రేమలు విఫలమయ్యాయనో, ఇంకొందరు తమకు అవమానాలు జరుగుతున్నాయనో ఆత్మహత్యలు చేసుకొంటున్నారు.

ఎన్నో విషాదకరసంఘటనలు జరుగుతున్నా బ్రతుకుతున్నామంటే మన వలన జరగవలసింది ఇంకా ఉందన్నమాటే కదా! పరీక్ష ఫెయిల్ అయినవెంటనే లేక ప్రేమ విఫలమైన వెంటనే లేక అవమానం పొందిన వెంటనే ప్రాణం దానంతట అది ఎందుకు పోవడం లేదు? అలా పోతే ఏం చెప్పలేము. కానీ 99% అలా పోవడం లేదే! అంటే ఇంకా అవకాశాలు ఉన్నాయన్న మాటే కదా!

ఏమైనా అంటే " మా పొజిషన్ లో మీరుంటే మీకు తెలుస్తుంది" అంటారు. ఎవరి స్థితి వారికి బాధాకరమైనదే. కాని అదే లోకమా? ఇంక ప్రపంచమే లేదా?

బ్రతకడానికి ధైర్యం కల్గించే మాటలు ఉపాధ్యాయులూ చెప్పరు, తల్లిదండ్రులూ చెప్పరు. అందరినీ అలా అనడం లేదు కానీ చాలా మంది ఇలానే ప్రవర్తిస్తున్నారు. ఎప్పటికీ ర్యాంకుల, మార్కుల గోలే కానీ ఒక పిల్లవాడు వ్యక్తిగతంగా ఎలా ఉంటున్నాడు? ఏం చేస్తున్నాడు? అని చాలామంది తల్లిదండ్రులూ, ఉపాధ్యాయులూ చూడడం లేదు.

ఇక స్నేహితుల విషయానికి వస్తే తమ స్నేహితుడు(స్నేహితురాలు) ఒకరిని ప్రేమిస్తున్నామంటే మద్దతు బాగా ఇస్తారు కానీ ఎందుకు సపోర్ట్ చెయ్యాలి,అవుతుందాలేదా అనే ముందుచూపు కానీ ఉండదు. అంతే కాక వారి ప్రేమ విఫలం ఐతే ధైర్యం చెప్పడం కానీ ఉండదు. అందరినీ ఇలా అనడం లేదు కానీ చాలామందే ఇలా ఉంటున్నారు.

నా ఇంజనీరింగ్ చదువు అయిపోయి 7 సంవత్సరాలు అవుతోంది. కానీ ఇంతవరకు నాకు పర్మనెంట్ ఉద్యోగం లేదు.ఎన్నో ఉద్యోగాలు చేతివరకు వచ్చి, చివరి క్షణంలో జారిపోయాయి. పార్ట్‌టైం ఉద్యోగాలే చేసుకొంటూ ఉన్నాను. ఇదే కారణాన వచ్చిన పెళ్ళిసంబంధాలు వెళ్ళిపోయాయి. ఇంట్లో వారి బాధలూ, బయటి వారి అవమానాలూ ఎన్నో భరిస్తున్నాను.బాధపడ్డాను ఎందుకంటే నేను కూడా ఒక మనిషిని మాత్రమే.అంతవరకే.కానీ ఏనాడూ ఒక స్థాయిని మించి బాధపడలేదు.

నాకు స్పూర్తిని ఇచ్చిన మహామంత్రం పరమహంస యోగానంద చెప్పిన" మనిషి ఎదుర్కోలేని కష్టాలను భగవంతుడు ఎన్నటికీ ఇవ్వడు ".
రామాయణంలోని సుందరకాండలో ఆంజనేయుడు ఒక మాట అంటాడు.""చనిపోవుట అనేక దోషాలకు కారణమవుతుంది. బ్రతికుంటే ఏనాటికైనా శుభం కలుగుతుంది"అని.ఇలాంటి స్పూర్తిదాయక మాటలు చెప్పేవారుండరు.

ఎప్పుడూ సిలబస్ పుస్తకాలే లోకం కానీ మహాత్ముల పుస్తకాలు చదవరు, అలా చదవడానికి ప్రోత్సాహం కూడా చాలా తక్కువే. కొంతమంది ఒంటరితనం భరించలేక కూడా ఆత్మహత్యలు చేసుకొంటున్నారు. వీరికీ తోడు ఇవ్వలేనప్పుడు మహాత్ముల,గొప్పవారి జీవిత చరిత్రల పుస్తకాలు చదవడమే తోడు అవుతుంది. అలా అలవాటు చేయడం ఎంతో ముఖ్యం కదా!.

పెద్దలు, తల్లిదండ్రులు మరియు ఉపాధ్యాయులు వీరందరికీ నా మనవి ఒక్కటే చదువులు ఎన్నైనా చదివించండి లేక చెప్పండి అలాగే మనుషులను ధైర్యవంతులుగా చేసే మాటలు, బ్రతకడానికి
స్పూర్తిని కల్గించే బోధనలు చెప్పండి.
స్నేహితులను కూడా ఇదే వేడుకొంటున్నాను.

చివరిగా ఒక మాట "బలమే(ధైర్యమే) జీవితము, బలహీనతయే మరణము". కాబట్టి ఆత్మవిశ్వాసము, ధైర్యమూ కలిగించే మాటలనే ఎప్పుడూ తల్చుకొందాము.
అలా అందరూ తలచుకొనేలా ప్రయత్నిద్దాము.

13 comments:

  1. మీ టపా మానసిక బలహీనులకు స్పూర్థినివ్వాలి.తల్లిదండ్రులు,ఉపాధ్యాయులు పిల్లలకు సరైన మార్గదర్శకులు కావాలి.

    ReplyDelete
  2. చక్కగా చెప్పారు. మీరన్నట్లు ఇలాంటి సంఘటనలకు మనిషి లోని భయమే కారణం. కష్టం ఎదురైన ప్రతి సారి చివర్లో మీరు చెప్పిన వివేకానందుడి వాక్యాలు తలుచుకుని "అసలు నేనెందుకు భయపడాలి?" అని ఒక్కసారి ప్రశ్నించుకుంటే చాలు. నెమ్మదిగా ధైర్యం తానంతట అదే అలవడుతుంది.

    ReplyDelete
  3. ఆత్మహత్య (Suicide) అనేకంటే ఇచ్ఛా మరణం అనటమే సరైనది. అది బలవన్మరణం కాదు.ఐ.పి.సి.309 సెక్షన్ ప్రకారం ఆత్మహత్యా ప్రయత్నంచేసి బ్రతికినవారిపై కేసులు పెడతారు. ఇప్పుడు ఆ సెక్షన్ రద్దుకోసం భారత లా కమీషన్ సిఫారసు చేసింది.
    ఇచ్ఛా మరణం పొందిన ప్రముఖులు:
    1. భీష్మాచార్యుడు అంపశయ్యపై తనువు చాలించాడు
    2. స్వామి వివేకానంద కపాల మోక్షం పొందారు
    3. పోతులూరి వీర బ్రహ్మం గారు సజీవ సమాధి అయ్యారు
    4. కానూ సన్యాల్ ఉరి వేసుకుని చనిపోయారు
    హిందూ ధర్మ శాస్త్రాలు ఆత్మ హత్యను మహాపాతకంగా వర్ణిస్తాయి.
    ఇస్లాం దృస్టిలో ఆత్మహత్య:
    * ఒకడు ఇనుప కమ్మీతో ఆత్మహత్య చేసుకుంటే అదే ఇనుప కమ్మీతో నరకాగ్నిలో శిక్షించబడతాడు. ఒక వ్యక్తి గాయపడి వాటి బాధ భరించలేక ఆత్మహత్య చేసుకున్నాడు. "నా దాసుడు తొందరపడి తనను తాను చంపుకున్నాడు, ఇతనికి పరలోక ప్రవేశం ఉండదు" అంటాడు అల్లాహ్. (బుఖారీ 2:445)
    * "ఊపిరాడకుండా చేసుకొని చనిపోయినవాడు నరకంలో కూడా ఊపిరాడని శిక్షలోనే ఉంటాడు. కత్తితో పొడుచుకొని చనిపోయినవాడు నరకాగ్నిలో సదా తనను తాను పొడుచుకుంటూనే ఉంటాడు. " (బుఖారీ 2:446)
    * ఒకడు ఏవస్తువుతో ఆత్మహత్య చేసుకుంటాడో పునరుత్థాన దినాన అదే వస్తువుతో హింసించబడతాడు.(బుఖారీ 8:73)
    క్రైస్తవం దృస్టిలో ఆత్మహత్య:
    * ఏసుక్రీస్తును పట్టించిన శిష్యుడు ఇస్కరియోతు యూదా ఉరివేసుకొని ఆత్మహత్య చేసుకుంటాడు. (మత్తయి27:5)
    * సౌలు తన కత్తిమీదే పడి ఆత్మహత్య చేసుకుంటాడు. (1 సమూయేలు 31:4)
    * సౌలు ఆయుధాలు మోసేవాడు తన యజమాని చనిపోయాడు కాబట్టి తాను కూడా (విశ్వాసంగలకుక్క) లాగాఆత్మహత్య చేసుకుంటాడు. (1 సమూయేలు 31:6)
    * సంసోను ( మానవ బాంబు ) లాగా ఆత్మహత్య చేసుకున్నాడు. (న్యాయాధిపతులు 16:26-31)
    * అబీమెలెకు ఆత్మహత్య చేసుకున్నాడు. (న్యాయాధిపతులు 9:54),
    * అహితోపెలు ఆత్మహత్య చేసుకున్నాడు. (2సమూయేలు 17:23),
    * జిమ్రీ ఆత్మహత్య చేసుకున్నాడు. (1 రాజులు 16:18),

    ఒక్క సంసోను తప్ప మిగతావారంతా నరకానికి వెళతారని క్రైస్తవుల అభిప్రాయం.

    * ఏసుక్రీస్తు పాపిష్టి ప్రజలకి బదులు చనిపోవటానికే ఈ లోకంలోకి తెలిసే వచ్చాడంటారు.
    ఆపడం ఎలా?
    1. ఎక్కువ మంది క్షణికావేశంలోనే ఆత్మహత్యలు చేసుకుంటారు. అప్పుడక్కడ వారిని ఎవరైనా ఆపితే ఆ క్షణం గడిచిపోతుంది. వాళ్ళు మళ్ళీ ఆత్మహత్య గురించి ఆలోచించరు.
    2. పని ఒత్తిడి, పరిమితి లేని కోర్కెలు... చిన్న విషయానికే ఆవేశం, మనస్థాపానికి గురవ్వడం, అసూయ వంటి మానసిక రుగ్మతలు తగ్గించుకోవాలి.
    3. బిడ్డల భవిష్యత్తు, జీవితాంతం కష్టసుఖాల్లో కలకాలం కలిసి ఉంటామని అగ్నిసాక్షిగా చేసుకున్న ప్రమాణం, ఆప్యాయత ఆవేశం వీడి గుర్తుతెచ్చుకోవాలి.
    4. సమశ్యలను తల్లిదండ్రులు, మిత్రులు ఆత్మీయులతో పంచుకోవాలి.
    5. పోషించే శక్తిలేనివారు పిల్లల్ని కనకపోవటం మంచిది.
    ఆత్మహత్యను ఆపే కొన్ని సామెతలు:
    * పరుగెత్తి పాలుతాగేకన్న నిలబడి నీళ్ళుతాగటం మంచిది
    * బతికియున్న శుభములు బడయవచ్చు
    * బతికుంటే బలుసాకుతిని బతకొచ్చు
    * చచ్చిన సింహం కంటే బతికున్న కుక్క మేలు
    * చచ్చి ఏం సాధిస్తావు?

    ReplyDelete
  4. అయా వ్యక్తులు క్లినికల్ డిప్రెషనులో కనుక వున్నట్లయితే ఎవరెంత ప్రయత్నించినా ధైర్యం వుండదు. మెదడులో వున్న కణాల అపసవ్యతకు తోడు ఒత్తిడి అధికం అయితే క్రుంగుబాటు వల్ల ఆత్మహత్య ఆలోచనలు వస్తాయి. ఆత్మహత్యల్లో కొంత శాతం ఇటువంటి కారణాల వల్ల సంభవిస్తుంటాయి. అలాంటి వారికి ధైర్యం నూరిపోసినదువల్ల సరిపోదు. ఆ కణాలను బ్యాలన్సు చేయడానికి మందులు వాడటమే శరణ్యం.

    ReplyDelete
  5. మందులూ-మాకులు కాదు మానసిక స్థైర్యాన్ని ఇచ్చే చదువులు కావాలి-తేవాలి.పరిస్థితులను సమర్ధవంతంగా ఎదుర్కొనే అంశాలను అటు పెద్దలూ,ఇటు ఉపాధ్యుయు లు కూడా భోదించాలి.ముఖ్యంగా పిల్లలు తమకు కష్టం కలిగినపుడు పెద్దలతో దాన్ని పంచుకోవాలి .కాని నేటి తరం అహం ముసుగులోకి చేరి ప్రాణాలకే ముప్పు తెచ్చుకుంటోంది.--జయదేవ్

    ReplyDelete
  6. Nrahamthulla చెప్పారు...
    ఆత్మహత్య (Suicide) అనేకంటే ఇచ్ఛా మరణం అనటమే సరైనది.
    @నరః ఇచ్ఛా మరణంలో మానవుడు తానూ అనుభవించాల్సిన కర్మలను అనుభవించి ,ఆత్మసంత్రుప్తి తో ఈ లోకాన్ని విడవడం. ఆత్మహత్య ఇందుకు పూర్తిగా విరుద్దమైన చర్య అని గుర్తింప ప్రార్ధన --జయదేవ్

    ReplyDelete
  7. Well said. I am reading your posts regularly these days. Good ones. I use to read lot about history and epics but don't have enough time now.
    good work !

    ReplyDelete
  8. >>ఎప్పుడూ సిలబస్ పుస్తకాలే లోకం కానీ మహాత్ముల పుస్తకాలు చదవరు, అలా చదవడానికి ప్రోత్సాహం కూడా చాలా తక్కువే...<<
    >>చదువులు ఎన్నైనా చదివించండి లేక చెప్పండి అలాగే మనుషులను ధైర్యవంతులుగా...<<

    నిజం చెప్పారండి

    ReplyDelete
  9. I can understand your feelings appreciate your thoughts on life, Suresh. Wish you success in your efforts to settle in your life.

    A nice video for you ..

    http://www.youtube.com/watch?v=in0yT37ugZA

    ReplyDelete
  10. కోట్లాది జీవరాశిలో ఉన్నతమైన మానవజన్మఎందుకు వచ్చిందో తెలుసుకునే మన చదువు కోల్పోతే ఇలాంటి స్థితికి దిగజారుతారు.ఇఛ్ఛా మరణానికి ఆత్మహత్యకు తేడావుమ్ది రహంతుల్లాగారు గుర్తించాలి

    ReplyDelete
  11. అందరూ తమ అభిప్రాయాలను పంచుకొన్నందుకు ధన్యవాదాలు. snkr గారూ! మంచి వీడియో చెప్పినందుకు ధన్యవాదాలు.

    ReplyDelete
  12. astrojoyd,durgeswara
    అవును అంగీకరించాను.ఇచ్ఛా మరణం అంటే సంత్రుప్తి తో స్వచ్చందంగా ఈ లోకాన్ని విడవడం.ఆత్మహత్య అంటే ఇందుకు పూర్తిగా విరుద్దంగా అయిష్టంతో విరక్తితో బలవంతంగా ఈ లోకాన్ని విడవడం.తనువు చాలించటమే రెంటిలోనూ జరిగేది.ఒకటి స్వచ్చందం మరొకటి నిర్బందం.ఒకటి మంచిది రెండోది చెడ్డది.

    ReplyDelete

Featured Post

వేశ్యల చేత మహాత్ముడు, దేవదూత అనిపించుకొన్న ఓ మహానుభావా! నీకు వందనం

ఒకసారి ఒక వ్యక్తి తన సహచరులతో కలిసి ఈజిప్టులో తిరుగుతూ పొరపాటున ఒక వేశ్యావాటికలోకి ప్రవేశించాడు. స్వతహాగా ఈ వ్యక్తి చాలా అందగాడు, మంచి స్...

Print Friendly and PDF

నా బ్లాగును ఇష్టపడేవారు