తెలుగ దేలయన్న దేశంబు తెలుగేను తెలుగు వల్లభుండ తెలుగొకండ ఎల్లవారు వినగ ఎరుగవే బాసాడి దేశ భాషలందు తెలుగు లెస్స

Monday, July 12, 2010

నేను హిందువును, అతడు ముస్లిం ఇంకొకతను క్రిస్టియన్ ఐనంత మాత్రాన కొట్టుకోవాలా? తిట్టుకోవాలా?

మనం అందరమూ చదువుకొన్నవాళ్ళము. లోకజ్ఞానము ఇంతో అంతో కలిగినవాళ్ళము. కాని మనము కూడా అనాగరికులలాగా మతము పేరుతో గొడవలు పడడము ఎంతవరకు సమంజసం?

ఎవరి మతము వారికి ప్రియము. ఆ ప్రియత్వము అనేది ఇతరమతాలను ద్వేషించకుండా ఉన్నంతవరకే బాగుంటుంది. ప్రత్యేకముగా ఏదో ఒక మతాన్ని లక్ష్యము చేసుకొని ఎప్పుడూ దానిపైనే బురద చల్లడానికి ప్రయత్నించడం సమంజసము కాదని నా వ్యక్తిగత అభిప్రాయము.

ఎవరి మతాలను వారు పొగడుకుంటూ, వారి మతాల గొప్పతనం గురించి కావాలనుకొంటే వారు వ్రాసుకోవచ్చు. అప్పుడు ఎవరికీ ఏ అభ్యంతరాలు ఉండవు. అలా కాకుండా ఇతర మతాల లోటుపాట్ల గురించి వాదించుకోనవసరం లేదని నా అభిప్రాయం. ఎందుకంటే మనం వాదించుకున్నంతమాత్రాన లేక వాటి గురించి గొడవ పడినంత మాత్రాన ఆయా మతధర్మాలు కాని, ఆచారసాంప్రదాయాలు కాని ఇసుమంతైనా మారవు కదా. ఊరికే మన మధ్య భేధాభిప్రాయాలు రావడం, వ్యక్తిగత కక్ష్యలు ఏర్పడడం( అసలు కనీసం ముఖపరిచయాలు కూడా లేకుండానే ) తప్ప వేరే ప్రయోజనం ఏమీ ఉండదు.

కొందరి తిండి లేదని, బట్టలు లేవని, ఇల్లు లేదని బాధ. ఈ మూడూ ఉన్న మనకు అభిప్రాయప్రకటన, వాక్స్వాతంత్రము పేరుతో వాదోపవాదాల బాధ. మొత్తానికి మనకు సౌలభ్యాలు ఎన్ని ఉన్నా ఏదో ఒక బాధను మెడకు గుదిబండలా తగిలించుకొంటే తప్ప మనకు జిల తీరదనుకొంటా.

నేనొక హిందువును. నా మతధర్మాలు నేను పాటిస్తాను. నాకు ముస్లిములు, క్రైస్తవులలో కూడా మంచి స్నేహితులున్నారు. మేము ఎవరి మతధర్మాలు వారు పాటిస్తాము. మా మత ధర్మాల గురించి, ఆచారసాంప్రదాయాల గురించి ఒకరికొకరు చెప్పుకొంటాము. కొత్త విషయాలు తెలుసుకొని ఆనందిస్తాము.

నాకు సమీర్ అనే ముస్లిం స్నేహితుడున్నాడు. భగవద్గీత గురించి అతను, ఖురాన్ గురించి నేను అతడిని తెల్సుకొంటుంటాము. ఉన్నట్టుండి అతను జ్ఞానయోగం అంటే ఏంటని అడుగుతాడు. నాకు తెలిసింది చెప్తాను. అలానే నాకూ అతని మతధర్మాలు గురించి నాకు చెప్తుంటాడు. అలానే ఫణి అనే క్రైస్తవ స్నేహితునితో కూడా ఇటువంటి సంబంధాలే ఉన్నాయి. మాకు ఎప్పుడూ మామా మతాల విషయంలో గొడవలు కానీ, వాదోపవాదాలు కానీ రాలేదు.

ఒకరి పండుగలకు మరొకరు శుభాకాంక్షలు చెప్పుకొంటాము. అంతవరకే. ఏ విషయములోనైనా మా మధ్య భేధాభిప్రాయాలు ఉండవచ్చు. కాని మా మతాల విషయాలలో, కుటుంబ విషయాలలో ఎంతో జాగ్రత్తగా ఉంటాము. ఎందుకంటే మత విషయాలు, కుటుంబవిషయాలు అత్యంత సున్నితమైనవని మాకు తెలుసు. వాటి విషయములో ఒక సారి అభిప్రాయభేధాలు గనుక వస్తే జీవితమంతా బాధపడవలసి వస్తుందని మాకు తెలుసు. అలా మా స్నేహాన్ని నిలుపుకొంటున్నాము.

అందరికీ తెలుసు వాదోపవాదాలు మనసుకు ఎంత అశాంతికి గురిచేస్తాయో. కాని వాదాలను వదలలేకుండా పోతున్నారు.

ఫలానా రాముడో లేక మహమ్మదో లేక ఏసుక్రీస్తో, వీరి గురించి మనం ఎందుకు పోట్లాడుకోవాలి? ఆయా మతాలవారు వీరిని పూజిస్తారు. వీరి వ్యక్తిత్వాలతో పోలిస్తే మన వ్యక్తిత్వాలు ఏ మూలకు? వారున్నరో లేదో మనకు ఎందుకు? ఉంటే ఉంటారు, లేకపోతే లేదు. కాని వారున్నారని, వారు తమ వ్యక్తిత్వాలతో, జ్ఞానంతో, ప్రవర్తనతో సమాజాలను ప్రభావితం చేసారని పెద్దలు చెబుతారు. అలాంటప్పుడు వారు భోధించిన, ఆచరించి చూపిన విషయాలను మనకు నచ్చితే అనుసరిద్దాము. నచ్చకపోతే వద్దు. అంతేకాని వారిని దూషిస్తూ, మనలో మనం వారి పేరుపై పోట్లాడుకొంటూ మనం ఎందుకు మనశ్శాంతిని పోగొట్టుకోవాలి? అవసరమా?

ఈ బ్లాగులు, కంప్యూటర్లు, ఆంగ్లము ఏమీ తెలియని గ్రామాల ప్రజలే పరమతసహనముతో ఒకరి మతాన్ని ఒకరు గౌరవించుకొంటూ ఆనందముగా ఉంటున్నారు. ఏ మతపండుగ వచ్చినా అందరూ కలిసి జరుపుకొంటూ సంతోషముగా ఉంటున్నారు. కాని ఇవన్నీ తెలిసిన మనం ఒకరికొకరు దుమ్మెత్తిపోసుకొంటున్నాము. నిజమే కదా?

చివరిగా ఒక మాట. తప్పు మతం పేరుతో చేసే తప్పులు చేసే మనుషులదే కాని, మతానిది ఎన్నటికీ కానేరదు.
ఇకనైనా మనము మతాల పేరుతో కువిమర్శలకు, వ్యక్తిగత విమర్శలకు దిగకుండా ఉండాలని నా అభిలాష.

11 comments:

  1. Hats off suresh... nice post...మంచి చెపితే ఎవ్వరికీ తలకెక్కదు... ఎవరూ మెచ్చుకోరు.. అది లోక రీతి... ఇదే పోస్టు నువ్వు మరో మతం మీద గాని, మరో కులం మీద గాని బురద జల్లడానికి ఉపయోగించి వుంటే... ఈ పాటికి కుప్పలు తెప్పలుగా కామెంట్లు... మంచి చెపితే మొహమాటనికి కూడా మెచ్చుకోరు.. కాని నువు రాస్తూనే వుండు.. ఇది చూసి ఒక్కరు మారినా సంతోషమే కదా...

    ReplyDelete
  2. సురేష్ బాబు గారూ
    మీ చివరి మాటః"తప్పు మతం పేరుతో చేసే తప్పులు చేసే మనుషులదే కాని, మతానిది ఎన్నటికీ కానేరదు" బాగుంది.
    http://nrahamthulla.blogspot.com/2010/05/blog-post_4207.html కూడా చూడండి.హిందూ-ముస్లిం భాయీ భాయి.

    ReplyDelete
  3. రహంతుల్లా గారూ! ధన్యవాదాలు.మీరు సూచించిన టపా చదివానండీ. ఆ టపాలో రెండవ వ్యాఖ్య వ్రాసింది నేనేనండీ.
    జగదీష్ గారూ! మీకు ధన్యవాదాలు.వ్యాఖ్యలు వస్తే వస్తాయి,లేకుంటే లేదు. కానీ చెప్పదలచుకొన్నది అందరికీ చేరితే చాలు.

    ReplyDelete
  4. మీ ఉద్దేశ్యం బాగుంది... వ్యక్తులుగా ఒక విషయంలో (ఇక్కడ మతం - పర మత సహనం ) మన భిన్నాభిప్రాయాలు కలిగి వుండవచ్చు! నా ఉద్దేశ్యం చెబితే మీరు నొచ్చుకుంటారని, నా అభిప్రాయం తో మీరు ఏకీభవిచడం లేదు అని, నేనె కరెక్టని అనుకుంటే అప్పుడు అనవసరపు వాదం .. సదుద్దేశ్యం తో చర్చిస్తే మన ఆలోచనా తీరు మెరుగు పడుతుంది. మీరు అనుమతిస్తే నా అలొచనలు మీ తో పంచుకుంటాను.
    మత ఘర్షణలు ఎందుకు జరుగుతున్నాయి ? కేవలం కొంత మంది స్వార్ధ పరులు వలన అని కొందరు అంటారు. కొంత మంది మత దురభిమానులు వలన మరి కొంత మంది అంటారు. కానీ ఏ మనిషి పుట్టుక తోనె చెడ్డవాడు కాదు అండీ. కొంత మంది అమాయకులు కూడా స్వార్ధపరుల చేతిలో కీలు బొమ్మలు అవుతారు. ఈ విషయం పై మీరు అనుమతిస్తే మీ తో చర్చించాలని వుంది. మీ అనుమతి కోసం ఎదురు చూస్తాను.

    ReplyDelete
  5. తప్పు మతములో కాదు మనిషిలో వుంది అనే మీ అభిప్రాయముతో ఏకీభవించినా మిగిలిన మీ టపాతో ఏకీభవించ లేకపోతున్నాను.

    నేను మంచి వాన్ని, నాకు తెలిసిన వాల్లు కూడా మంచి వాల్లే కాబట్టి నేను సమాజములో జరిగే చేడును పట్టించుకోను అంటే ఎలా? ఒక జింక తాను మాంసాహారి కాదు, తన జాతివారూ మాంసాహారులు కాదు కాబట్టి తానను ఎవ్వరూ ఏమీచేయరని అనుకుంటే దాని మనుగడ ఉంటుందా? పులి గురించి ఆలోచించకుండా ఉండడం ఆదర్శమవుతుందా? మేకతోలు కప్పుకున్న పులులు, దేశభక్తి ముసుగులో ఉన్న మతవాదులు, సెక్యులర్ ముసుగులో ఉండే తీవ్రవాదులూ పుస్ఖలంగా ఉన్న మన సమాజములో పట్టించుకోకుండా ఉండడం సాధ్యమా?

    మీరు చెప్పినవి పొలిటికల్లి కరెక్ట్గా ఉంటుందే తప్ప వాస్తవానికి దగ్గరగా మాత్రం లేదన్నది నా అభిప్రాయం.

    ReplyDelete
  6. @ ఆకశ రామన్న గారు ,
    ఇక్కడ చిక్కు ఏమిటి అంటే పులుల గుంపులో ఆవులు, మేకల గుంపులో తోడేళ్లు వున్నాయి మరి... నా వరకు అనిపించేది ఏమిటి అంటే.. ఈ ఆవులు , మేకులు మాత్రమే మొదట వుండేవి అని, వాటి తిండిలో ఏదొ తేడా వుందేమొ ?

    ReplyDelete
  7. మతం వ్యక్తిగత విషయంగా మిగిలినంతవరకూ అది వ్యక్తిబాధ్యత.అప్పుడు మాత్రమే మతం పేరుతో మనుషులు చేసేదానికి మనిషి బాధ్యత. ఎప్పుడైతే మతం ఒక సామాజిక పోకడ అవుతుందో, అప్పుడు మనిషి బదులు మతానికి ఆ అవలక్షణాలు ఆపాదించబడతాయి. అది సహజం. అదే సరైనది కూడా.

    The moment religion becomes organized it seizes to be individual's business.It becomes a social trend. Then basis for such trend will be condemned. Not individuals.

    మతాన్ని ప్రశ్నించడం గుడ్డిగా నమ్మేవాళ్ళకు ధూషించడంగా కనిపిస్తే అది ప్రశ్నించేవాళ్ళ తప్పు కాదు. విజ్ఞానానికి మూలం ప్రశ్నించడం. గుడ్డిగా నమ్మడం కాదు.

    ReplyDelete
  8. ఆకాశ రామన్న గారూ! నేను రాజకీయవేత్తను కాదు. ఒక సామాన్య పౌరుణ్ణి మాత్రమే. నేను నా మనసులోని సంఘర్షణను ఈ టపాలో ఉంచాను.
    మీరు చెప్పినటువంటి "మేకతోలు కప్పుకున్న పులులు, దేశభక్తి ముసుగులో ఉన్న మతవాదులు, సెక్యులర్ ముసుగులో ఉండే తీవ్రవాదులూ" మొదలగు విషయాల గురించి నేను ప్రస్తావించలేదు. అసలు వాటికీ, ఈ టపాకూ సంబంధం లేదు. అందరూ మా స్నేహితులలా ఉండకపోవచ్చు. కానీ అలా ఉంటే బాగుంటుందని మాత్రమే నేను చెప్పదలచుకొన్నది.
    కృష్ణ గారూ! ప్రస్తుతం వేదాలు వాటి విషయం నేను చదువుతున్నాను. అందువలన ప్రస్తుతానికి మత విషయాల గురించి చర్చించలేను. క్షమించగలరు.
    మహేష్ గారూ! ఎవరి మతాన్ని వారు ప్రశ్నించుకోవడం, సమాధానాలు పొందడం సరైనదిగా నేను భావిస్తాను. అంతేకాని ఇంకో మతం గురించి ప్రశ్నించడం అసమంజసం అన్నది నా వ్యక్తిగత అభిప్రాయం.

    ReplyDelete
  9. @ మహేష్ గారు,
    వెల్ సెడ్ !
    >> మతాన్ని ప్రశ్నించడం గుడ్డిగా నమ్మేవాళ్ళకు ధూషించడంగా కనిపిస్తే అది ప్రశ్నించేవాళ్ళ తప్పు కాదు. విజ్ఞానానికి మూలం ప్రశ్నించడం. గుడ్డిగా నమ్మడం కాదు. >>
    ఈ విషయం లో మీ తో పూర్తిగా ఏకీభవిస్తాను.
    @ సురేష్ గారు,
    మన మతం లో చెడుని ప్రశ్నించితే తిన్న ఇంటి వాసాలు లెక్క పెడుతున్నామని , మన దేశం రాజకీయంగా తప్పులు చేసింది అంటే దేశ ద్రోహి అని అనుకునే వారు వుంటారు. వారి తో జాగ్రత్త!
    ఇక పోతే ప్రతి మతం ఒక జీవన విధానం! మనిషిగా మనం సరైన రీతిలో జీవించాలంటే ఏది సరి అయినదో తరచి చూసే సమయం లో , వాటి తప్పు ఒప్పులు చూస్తాము కదా! మన ఆలోచనా రీతి కరెక్టో కాదో ఎలా తెలుస్తుంది ? ప్రశ్నిచక పోతే ! తప్పులుని ప్రశ్నిచకపోతే! మీకు ఈ విషయంలో ఇంకేదైనా దారి కనిపిస్తే నాకు కూడా చెప్పండి.

    ReplyDelete
  10. అకాశారామన్న గారు చెప్పినన మాటలు అక్షరాలా వాస్తవము.
    ఈ ఆర్టికల్ ఊహలకి దగ్గిరగా వాస్తవాలకి చాలా.....దూరంలో ఉంది.

    ReplyDelete
  11. సురేష్ గారూ! మీ ఈ టపా చాలా బాగుందండీ. వాస్తవం లో మీరంటున్నట్లు జరగడానికి అవకాశం తక్కువగా ఉన్నా అలా జరిగితే బాగుండు అన్న మీ ఆలోచనా తీరుకి really hats off.

    ReplyDelete

Featured Post

వేశ్యల చేత మహాత్ముడు, దేవదూత అనిపించుకొన్న ఓ మహానుభావా! నీకు వందనం

ఒకసారి ఒక వ్యక్తి తన సహచరులతో కలిసి ఈజిప్టులో తిరుగుతూ పొరపాటున ఒక వేశ్యావాటికలోకి ప్రవేశించాడు. స్వతహాగా ఈ వ్యక్తి చాలా అందగాడు, మంచి స్...

Print Friendly and PDF

నా బ్లాగును ఇష్టపడేవారు